Nazire Petova, nëna e Dritan Petovës që ditën e djeshme vrau të shoqehn, vjehrrin dhe më pas veten, është përpjekur ta bindë atë që të mos vetëvritet.
Ajo ka shkuar bashkë me dy oficerë të RENEA-s tek shtylla ku 41-vjeçari kishte hipur dhe i është lutur të mos bëjë asnjë veprim, por nuk ja ka dalë ta bindë të birin.
“Tani, zbrit prej andej të keqen nëna, se çfarë u bë u bë.
Asgjë nuk kthehet mbrapsht tani.
Nëna të ka falur, të kemi falur të gjithë.
Zbrit se ke dy fëmijë të vegjël për të rritur.
Ke djalin që po të shikon nga shtëpia, ke vajzën që të do.
As policët nuk do të të bëjnë asnjë gjë. Pasi të zbresësh, nëna do të të përqafojë.
Duhet të kërkojmë falje te shtëpia e nuses.
Edhe fëmijët do të të falin. Zbrit, bëje për nënën tënde që është e sëmurë. Hidhe armën në tokë”, i është lutur ajo mes lotëve, të birit.
Ajo ka rrëfyer në polici, se pasi kishte vrarë gruan dhe vjehrrin, ai kishte shkuar në shtëpi dhe kishte marrë një shishe ujë.
“Dritani erdhi në mëngjes herët në shtëpi e qëndroi vetëm dy minuta.
Mori një bidon ujë, gjuha i rrinte e tharë, dhe iku me vrap. Ishte i zbehtë si limoni, me armën e gjahut në krah. Nxitonte, nuk tha çfarë kishte bërë. Mendova se kishte etje e po ikte prapë në punë”, ka thënë ajo për policinë.
E moshuara thotë se i biri ishte në prag divorci me të shoqen, pasi grindeshin vazhdimisht.
Ajo ishte larguar nga shtëpia prej dy javësh, bashkë me vajzën 12-vjeçare, ndërsa djali 10-vjeçar kishte qendruar me të atin.
E moshuara thotë se i biri pinte vazhdimisht./b.l