Vasja e dy ushtarëve turq, duket se ka vënë në rrezik, paqen dy-vjeçare mes Ankarasë dhe grupit të militantëve kurdë. Ushtria turke bën përgjegjës militantët kurdë për sulmin me autobombë në qytetin Juglindor të Diyarbakirit, mbetën dy ushtarë turq të vdekur dhe 4 të tjerë të plagosur.
Disa ditë më parë, Turqia nisi bastisjet e vendndodhjeve të militantëve të Partisë së Punëtorëve të Kurdistanit (PKK) e më pas sulmet ndaj objektivave të tyre në Irak, njëkohësisht me sulmet ajrore ndaj xhihadistëve të Shtetit Islamik në Siri. Sipas ministrit të jashtëm turk, Mevlut Cavusoglu, synimi i këtyre sulmeve, ndaj IS është që të krijohet një zonë sigurie.
“Kemi vepruar gjithnjë me synimin për të sjellë qëndrueshmëri në të dyja vendet, sepse i konsiderojmë ata si pjesë të së njëjtës fotografi. Do të duhet të krijohet një zonë sigurie dhe disa zona ndalimfluturimi në Siri. E kemi nënvizuar disa herë se, zgjidhja e problemit të Sirisë është thjesht dhe vetëm politike.”
Ndërkohë, Shtëpia e Bardhë ka reaguar këtë të dielë, duke u shprehur se mirëpret përpjekjet e Turqisë për të luftuar Shtetin Islamik, ndërsa e ka konsideruar PKK-në e militantëve kurdë në Turqi, një “organizatë terroriste”.